拉姑專訪談「鋒芝」
拉姑專訪談「鋒芝」
鋒芝變擾攘個多月，一直保持緘默的嫲嫲狄波拉（拉姑），昨日終開腔接受本報獨家專訪，澄清近日有關她不滿栢芝與陳冠希機艙自拍而怒摑新抱之是是非非。拉姑強調，她從沒有鬧栢芝、打栢芝，雖然拉姑拒評論霆鋒離婚，但談到自己未能見到一對孫兒時，拉姑忍不住傷心痛哭說：「痛！一個字，痛！一個我哋唔識嘅孤兒，都可以去探訪，但自己兩個孫，你係冇嘢做得到。」
昨日一身白色打扮的狄波拉，在丈夫鬍鬚 Kong陪同下面對面接受本報記者專訪，但婉拒拍照，儘管拉姑全程戴上墨鏡，但每當談到霆鋒及一對孫仔時，拉姑總難掩愁容，言談間拉姑一次又一次傷心落淚，更為近月來未能見到一對乖孫而失聲痛哭。
拉姑表示，今次她開腔主要目的，並非要講誰是誰非、誰對與錯，而是要澄清近日有關她不滿張栢芝跟陳冠希機艙自拍而怒摑新抱的傳聞。
哭訴：我冇打過人
拉姑邊飲泣邊無奈說：「朋友同我講，外邊傳你打佢（栢芝），你唔出聲嘅話，第日啲孫仔咪真係以為你打過佢媽咪……其實更難聽嘅傳聞都有，但我覺得係咪可以平衡啲？或者話係我俾人打（苦笑）……唔好俾孫仔第時咬實我，以為我真係打過佢媽咪。我冇鬧過人、冇打過邊個人，冇參與過佢哋婚姻……」話未說完，一臉委屈的拉姑已泣不成聲，然後緊緊捉實記者的手，叮囑記者一定要代她平反怒摑栢芝傳聞並非屬實。
問拉姑近日有否見過 Lucas和 Quintus，拉姑苦笑搖頭，隨即眼淚大滴大滴淌下來，在旁的鬍鬚 Kong即忙加安慰，惟之後記者提及栢芝日前離港到歐洲工作，寧將 Lucas和 Quintus交由菲傭和化妝師好友 Rick Chin照顧也不交託嫲嫲，以及提到 Lucas讀書問題時，拉姑又再控制不住伏在椅背痛哭，直至心情稍稍平復，始說：「痛！一個字，痛！一個我哋唔識嘅孤兒，都可以去探訪，但自己兩個孫，你係冇嘢做得到，係痛……我唔係話我兩個孫大晒，但佢哋只係兩個小朋友嚟……」
自嘲：聽命嘅老人
日前霆鋒親口承認婚姻出了問題，並示意自己正着手辦離婚。對霆鋒婚變，拉姑不予置評，只說：「呢個係個仔下一代嘅嘢，我嘅宿命已經唔好，因為霆鋒結婚唔話畀阿媽知，所以外界就認定阿媽唔鍾意呢個新抱。係全港傳媒同我定咗呢個位！我想講，我同佢（栢芝）從來冇拗撬，不過，你話佢唔鍾意我，可能係，但我從來唔介入佢哋，因為我想留番啲空間畀佢哋，我從來唔發表意見、唔插手！我形容畀你聽，我真心講畀你聽（說時捉實記者的手），我只係一個喺門口聽命嘅老人！有乜嘢我只會拎起個電話話：『得得得，好呀！』我今日唔係想講我點好、點偉大，我只係唔想俾孫仔誤會我打佢哋媽咪，唔想孫仔第日返學俾人話：『你媽咪俾嫲嫲打。』咁我就心滿意足 o架啦。」
感嘆：難審家庭事
由栢芝與陳冠希機艙言好、查小欣大爆栢芝陰乾霆鋒數億身家，以致栢芝數臭霆鋒不是個好老公、好父親，拉姑一概拒絕評論及回應，只嘆說：「清官難審家庭事，講多錯多，我唔會回應！我出嚟唔係博同情，我只係想話畀兩個孫知，嫲嫲冇打人！」
目前霆鋒仍身在大馬拍攝電影《逆戰》，而栢芝則已返港照顧一對兒子。昨日傳出栢芝離港到寧波拍片，霆鋒則於傍晚返港，令機場氣氛變得緊張，但據悉霆鋒本月 8日在電影煞科後才返港，至於栢芝則有指今日出發到寧波開工。
拉姑陪阿仔共度時艱
自 5月張栢芝與陳冠希機艙合照事件，引爆鋒芝婚變以來，狄波拉一直將手提電話關上，甚至一度飛往新加坡避靜，至日前才低調返港。對於有關鋒芝變的新聞，拉姑昨日接受訪問時坦言自己不聞不問。
拉姑說：「我好耐冇睇報紙、冇聽電話，亦唔敢睇電視，我匿埋自己一個空間，因為我個仔有難，我要陪佢共度時艱。」
「唔使搞成咁」
拉姑表示她與四哥謝賢也經歷過婚姻失敗，但認為做不成夫妻也可以做朋友。她說：「四哥同狄波拉離婚，謝寧離婚……家世界有半個地球都係單親家庭長大，就連奧巴馬都係單親家庭長大……我唔係扮偉大，但我覺得我同四哥可以畀下一代做一個好好嘅教材，就算做唔成夫婦，都唔一定要搞成咁樣。」
對栢芝近日的所作所為，拉姑苦笑說：「我唔會答，我只會答自己唔係一個好榜樣，總之呢個時間我應該係同個仔攜手共度難關。」
拉姑專訪談「鋒芝」 影片
影片：拉姑四哥展鋒芝攻防戰
影片：獨家拉姑淚漣漣念乖孫：痛
